လူရှိန်စေမယ့် ကိုယ်ရည်ကိုယ်သွေး..

လူတွေရဲ့ ချစ်ခင်မှုကိုရစေမယ့် ကိုယ်ရည်ကိုယ်သွေးမျိုးတွေ ရှိပါတယ်။ ဥပမာအားဖြင့်တော့ ကူညီတတ်တယ်၊ ဟာသဥာဏ်ရွှင်တယ်၊ အပေါင်းအသင်းမင်တယ်၊ စသဖြင့်ပေါ့။ ဒီလိုမျိုးပဲ လူတွေရဲ့ လေးစားမှုကိုရစေမယ့် ကိုယ်ရည်ကိုယ်သွေးတွေ ရှိပါတယ်။ ဥပမာ - ချိန်းထားရင် အချိန်တိကျတယ်၊ အလုပ်ကို စေ့စပ်သေချာအောင် လုပ်တယ်၊ အကောင်းဆုံးဆိုတာတွေကိုပဲ ဖြစ်အောင်လုပ်တယ် ဆိုတာမျိုးတွေပေါ့။ ဒီတစ်ခါမှာတော့ လူရှိန်စေမယ့် ကိုယ်ရည်ကိုယ်သွေးတစ်ချို့ကို တင်ပြလိုက်ပါတယ်။ သင့်မှာ ဒီလိုအရည်အသွေးမျိုးရှိနေမယ်ဆိုရင် ဘာပဲဖြစ်ဖြစ် သင့်အနားမှာရှိတဲ့သူတွေရဲ့ ရှိန်သွားတာကို ခံရစေနိုင်ပါတယ်။

(၁) ဘယ်တော့မှ ဆင်ခြေမပေးဘူး။

ကောင်းတဲ့ရလဒ်အတွက်လည်း ဂုဏ်ယူဝင့်ကြွားမနေဘူး။ မကောင်းတဲ့ ရလဒ်အတွက်လည်း စောဒကတက်တာတွေ၊ ဆင်ခြေပေးနေတာတွေမရှိတဲ့သူကို လူတွေက ရှိန်ပါတယ်။ ဖြစ်လာတဲ့ရလဒ်တစ်ခုအတွက် တာဝန်ယူဖို့ကိုပဲ အာရုံထားပြီး အပိုအလုပ်တွေကိုလည်း သိပ်လုပ်လေ့မရှိပါဘူး။ အဓိကနဲ့ သာမညကို ခွဲခြားတတ်တဲ့သဘောပါ။

(၂) အမှီအခိုကင်းတယ်။

လူတွေကြားမှာ တစ်ယောက်နဲ့တစ်ယောက် ရိုင်းပင်းကူညီမှုဆိုတာ လိုအပ်ပါတယ်။ ဒါပေမယ့် အရင်ဆုံး ကိုယ့်အားကိုယ်ကိုးသင့်တယ်ဆိုတဲ့အချက်ကိုတော့ မေ့နေလို့မဖြစ်ပါဘူး။ လိုအပ်လာတဲ့အခိုက်အတန့်မှာ တစ်စုံတစ်ယောက်ကို အကူအညီတောင်းနိုင်ပါတယ်။ ဒါပေမယ့် အမြဲတမ်းအလိုလို တစ်ဖက်သားကို မှီခိုနေလို့တော့ မဖြစ်ပါဘူး။ အများအားဖြင့် အမှီအခိုကင်းတဲ့သူတွေကို လူရှိန်ပါတယ်။

(၃) အသေးအဖွဲစကားတွေကို မုန်းတယ်။

ဆိုလိုတာက အရည်မရ၊ အဖတ်မရစကားတွေပြောပြီး အချိန်ကုန်ခံနေတာမျိုးတွေကို ပြောတာပါ။ များသောအားဖြင့် အကျိုးရှိတာမျိုးတွေကိုပဲ ပြောလေ့ရှိပါတယ်။ ဒါပေမယ့် ဒီနေရာမှာ တစ်ခုသတိထားရမှာက အမြဲအလိုလို လေကြီးလေကျယ်တွေ ပြောမနေမိဖို့ပါပဲ။ အခြေအနေနဲ့အချိန်အခါဆိုတာ ရှိပါတယ်။ ပေါ့ပေ့ါပါးပါးစကားပြောရမယ့်နေရာမှာ ပေါ့ပေါ့ပါးပါးပဲ ပြောဆိုပါ။ ဒါပေမယ့် အကျိုးရှိတဲ့စကားဝိုင်းအတွက်လည်း ကိုယ်ဟာ အမြဲတမ်းအဆင်သင့်ဖြစ်နေတယ်ဆိုတာ လူတိုင်းသိပါစေ။

(၄) ပတ်ဝန်းကျင်ကို ဂရုစိုက်တတ်တယ်။

ပတ်ဝန်းကျင်မှာ ဖြစ်နေသမျှ အရာတွေ၊ ပတ်ဝန်းကျင်မှာ ရှိနေတဲ့သူတွေနဲ့ ပတ်သက်တဲ့အရာတွေကို သိနေမယ်ဆိုရင် သင့်ကို လူရှိန်စေပါတယ်။ အခြေခံအားဖြင့်တော့ သင်ဟာ စူးစမ်းလေ့လာတတ်တဲ့သူ၊ ဗဟုသုတရှိတဲ့သူလို့ လူတွေ သတ်မှတ်လိုက်ကြလို့ပါပဲ။ ဒီတော့ လူရှိန်ချင်တယ်ဆိုရင် အကြောင်းအရာတွေနဲ့ လူတွေအကြောင်းကို ဂရုပြုဖို့လိုပါမယ်။ လျစ်လျူရှုထားလို့မရပါဘူး။

(၅) လုပ်စရာရှိတဲ့အလုပ်ကိုသာ လုပ်။

လူတွေရဲ့ ဝေဖန်မှုတွေ၊ ချီးကျူးမှုတွေကို သိပ်ဂရုမစိုက်ဘဲ သင်လုပ်စရာရှိတဲ့အလုပ်ကိုသာ အာရုံစိုက်လုပ်တတ်တဲ့အကျင့်ဟာလည်း လူရှိန်စေပါတယ်။ သင်ဟာတကယ်ပဲ အလုပ်တစ်ခုတည်းကို ဦးစားပေးတဲ့သူလို့လည်း လူတွေက သတ်မှတ်လိုက်ကြပါတယ်။

(၆) အကြောက်တရားမဲ့ခြင်း။

လူတိုင်းမှာ ကိုယ်စီကိုယ်စီ အကြောက်တရားရှိပါတယ်။ တစ်ယောက်နဲ့ တစ်ယောက် ကြောက်တတ်တဲ့အရာခြင်းသာမတူပေမယ့် မတူညီတဲ့အကြောက်တရားတွေရှိပါတယ်။ ဒါကို ဖုံးကွယ်ထားလို့မရပါဘူး။ ဒါပေမယ့် အကြောက်တရားကို ရင်ဆိုင်နိုင်ခြင်း၊ ကျော်လွှားနိုင်ခြင်း၊ နောက်ဆုံး ဘယ်လိုမှမတတ်သာရင် ဖုံးကွယ်နိုင်ခြင်းဆိုရင်တော့ လူရှိန်ခံရနိုင်ပါတယ်။ သင့်ကို မကြောက်တတ်တဲ့သူလို့ သတ်မှတ်လိုက်ကြပါတယ်။

(၇) လူတွေအကြောင်း သိနားလည်းခြင်း။

လူရှိန်ခံရခြင်းရဲ့ အခြေခံအကျဆုံးကတော့ လူတွေအကြောင်းကို နားလည်ဖို့ပါပဲ။ လူတွေမှာ အထင်ကြီးစိတ်တွေရှိပါတယ်။ ဒီစိတ်တွေအကြောင်းကို နားလည်မယ်၊ အထာနပ်မယ်ဆိုရင် လူရှိန်ခံရဖို့ သိပ်မဝေးပါဘူး။ နောက်ဆုံး ကိုယ့်ကိုယ်ကိုပဲ ဇွတ်အထင်ကြီးတဲ့သူတွေမှာတောင် အားနည်းချက်ရှိပါတယ်။ ဒါကတော့ သူတို့နဲ့တူတဲ့သူတွေကို ပြန်အထင်ကြီး၊အသိမှတ်ပြုတာပါပဲ။

ရွှေညာမောင် (Focus Youth E-magazine)
Ref: LH

အဆင်ပြေပါစေ..